A Bola ma’lumotiga ko‘ra, «Sporting» Jessi Derrini yanvar oyida «Chelsi»ga muddatidan oldin qaytarishni rejalashtirmayapti.

19 yoshli vinger ijara asosida Portugaliya klubiga o‘tganidan buyon 3 ta uchrashuvda jami 26 daqiqa maydonda harakat qildi. Shu sabab Angliyada futbolchining o‘yin amaliyoti kamligidan noroziliklar kuchaygan.

The Sun nashri muxlislar orasida «uni qaytaringlar» degan chaqiriqlar ko‘payganini qayd etdi. Ular Derri rivojlanishi uchun muhim bo‘lgan vaqtni boy berishi mumkinligidan xavotirda.

Biroq «Sporting»dagi manbalar futbolchini muddatidan oldin qaytarish masalasi «kun tartibida yo‘q»ligini ta’kidlamoqda. Klub Angliya yoshlar terma jamoasi futbolchisiga Portugaliya futboliga moslashish uchun yetarli vaqt berish niyatida.

Derri asosiy tarkib uchun kuchli raqobatga duch kelmoqda. Klub akademiyasi tarbiyalanuvchisi Flaviu Gonsalvesh o‘z o‘rnini mustahkamlab bormoqda, shuningdek, «Uotford»dan kelgan Nestori Irankunda ham o‘yin vaqti uchun kurashmoqda.

«Sporting» Derri uchun individual mashg‘ulot dasturini ham ishlab chiqqan. Unda jismoniy kuchni oshirish, himoyadagi harakatlar va to‘psiz o‘yin ustida ishlashga alohida e’tibor qaratilmoqda. Bu futbolchini Portugaliya chempionati talablariga yaxshiroq tayyorlashga qaratilgan.