A Bola маълумотига кўра, «Спортинг» Жесси Деррини январь ойида «Челси»га муддатидан олдин қайтаришни режалаштирмаяпти.

19 ёшли вингер ижара асосида Португалия клубига ўтганидан буён 3 та учрашувда жами 26 дақиқа майдонда ҳаракат қилди. Шу сабаб Англияда футболчининг ўйин амалиёти камлигидан норозиликлар кучайган.

The Sun нашри мухлислар орасида «уни қайтаринглар» деган чақириқлар кўпайганини қайд этди. Улар Дерри ривожланиши учун муҳим бўлган вақтни бой бериши мумкинлигидан хавотирда.

Бироқ «Спортинг»даги манбалар футболчини муддатидан олдин қайтариш масаласи «кун тартибида йўқ»лигини таъкидламоқда. Клуб Англия ёшлар терма жамоаси футболчисига Португалия футболига мослашиш учун етарли вақт бериш ниятида.

Дерри асосий таркиб учун кучли рақобатга дуч келмоқда. Клуб академияси тарбияланувчиси Флавиу Гонсалвеш ўз ўрнини мустаҳкамлаб бормоқда, шунингдек, «Уотфорд»дан келган Нестори Иранкунда ҳам ўйин вақти учун курашмоқда.

«Спортинг» Дерри учун индивидуал машғулот дастурини ҳам ишлаб чиққан. Унда жисмоний кучни ошириш, ҳимоядаги ҳаракатлар ва тўпсиз ўйин устида ишлашга алоҳида эътибор қаратилмоқда. Бу футболчини Португалия чемпионати талабларига яхшироқ тайёрлашга қаратилган.