Osiyo o‘yinlari tashkilotchilari musobaqaning dastlabki kunlarida kutilayotgan noqulay ob-havoga tayyorgarlik ko‘rmoqda. Reuters nashrining xabar berishicha, 21 sentyabr, dushanba kuni Aichi-Nagoya qirg‘oqlariga yopirilishi kutilayotgan to‘fon musobaqalar dasturiga jiddiy ta’sir ko‘rsatishi mumkin.
Ma’lumotlarga ko‘ra, Yaponiyaning Tinch okeani qirg‘oqlari yaqinida hosil bo‘lgan “Dujuan” bo‘roni Nagoya shahri joylashgan markaziy mintaqa tomon shimoli-g‘arbiy yo‘nalishda harakatlanmoqda. Bo‘ronning doimiy tezligi soatiga 90 kilometrni tashkil etayotgan bo‘lsa, shamolning kuchayishi 126 km/soatgacha yetishi kutilmoqda.
Yaponiya Olimpiya qo‘mitasi (JOC) ijroiya kengashining yuqori lavozimli a’zosi va musobaqada Yaponiya delegasiyasi rahbari Kosey Inoue payshanba kungi matbuot anjumanida kutilayotgan ob-havo xavfi haqida to‘xtalib o‘tdi.
“Kuchli yomg‘ir va noqulay ob-havo sababli ba’zi musobaqalar allaqachon kechiktirildi yoki qoldirildi. Qolaversa, 21 sentyabr kuni to‘fon mintaqaga yanada yaqinlashish ehtimoli bor. Hozirgi sharoitdan kelib chiqib, kutilmagan vaziyatlarga to‘liq tayyor turish va to‘g‘ri chora ko‘rish maqsadida Yaponiya Olimpiya qo‘mitasi ichida mutaxassislar bilan yig‘ilishlar o‘tkazyapmiz”, dedi Inoue jurnalistlarga.
Eslatib o‘tamiz, o‘tgan haftada ham Nagoya va uning atrofidagi hududlarda kuchli jala quygan edi. Oqibatda maktablar yopilib, poyezdlar qatnovi to‘xtatilgan va bir necha yuzlab sportchilar o‘z yashash joylaridan evakuasiya qilingandi.
Ma’lumot uchun, XX Osiyo o‘yinlari 19 sentyabrdan 4 oktyabrgacha Yaponiyaning Aichi-Nagoya shahrida bo‘lib o‘tadi. Musobaqaning rasmiy ochilish marosimi 19 sentyabr, shanba kuniga belgilangan bo‘lsa-da, futbol, basketbol va voleybol kabi jamoaviy sport turlari bo‘yicha bahslar allaqachon boshlanib ketgan. Turnirda Osiyo olimpiya kengashiga a’zo 45 ta Milliy olimpiya qo‘mitasidan sportchilar va rasmiy delegasiyalar ishtirok etishi kutilmoqda. Turnida 43 ta sport turining 70 ta yo‘nalishida 468 ta medallar jamlanmasi o‘ynaladi. 5-Paraosiyo o‘yinlari esa 18-24 oktyabr kunlari Aichi-Nagoya shahrida o‘tkaziladi.
