Madridning «Real» klubi hujumchisi Kilian Mbappe jamoa yangi futbolchisi Yan Diomandening moslashuv jarayoni haqida fikr bildirdi.

19 yoshli vinger «RB Leypsig»dan 125 million yevroga xarid qilingan, bonuslar bilan transfer summasi 140 million yevrogacha yetishi mumkin. Kot-d’Ivuarlik futbolchi hozircha har doim ham asosiy tarkibdan joy olayotgani yo‘q. U ilk samarali harakatini yaqinda «Elche»ga qarshi o‘yinda golli uzatma bilan qayd etdi.

«Yan Diomandening juda iqtidorli ekani aniq. Odamlar 140 million yevro haqida ko‘p gapirishyapti, ammo u atigi 19 yoshli yigit.

Biz uni himoya qilishga harakat qilyapmiz, chunki u bizga kerak. Mavsum juda uzun, shu sabab faqat 11 nafar futbolchiga tayanib bo‘lmaydi», — deya Mbappening so‘zlarini Madrid Universal keltirdi.

Yakshanba kuni Joze Mourinyu boshchiligidagi «Real» Madrid derbisida «Atletiko»ga qarshi maydonga tushadi.