Angliya Premyer-ligasining 5-turi doirasida Birmingemning «Aston Villa» klubi safarda Londonning «Tottenxem» jamoasiga qarshi maydonga tushadi. Uchrashuv oldidan mehmonlar bosh murabbiyi Unai Emeri o‘z fikrlari bilan o‘rtoqlashdi.
«Raqibimiz juda katta salohiyatga ega. O‘tgan yozda «Tottenxem» katta mablag‘ sarflab, kuchli futbolchilarni o‘z safiga qo‘shib oldi. Hozir ularga o‘zaro moslashib olish uchun biroz vaqt kerak.
Bizni jiddiy sinov kutmoqda. Mening fikrimcha, «Tottenxem» Premyer-liganing eng kuchli to‘rt jamoasi qatorida bo‘lishi kerak», — deya Emerining so‘zlarini klub matbuot xizmati keltirdi.
«Tottenxem» — «Aston Villa» uchrashuvi bugun, 19 sentyabr kuni Londonda bo‘lib o‘tadi. Bahs Toshkent vaqti bilan soat 16:30 da boshlanadi.
