Amsterdamning «Ayaks» klubi yarim himoyachisi Abdella Uazan yana Madridning «Real» klubi rahbariyati qiziqish doirasiga tushdi. Bu haqda jurnalist Ekrem Konur xabar bermoqda.
«Qirollik klubi» 17 yoshli yarim himoyachini 2025 yilda o‘z safiga qo‘shib olishni istagan edi. Biroq o‘sha paytda futbolchi tibbiy ko‘rikdan muvaffaqiyatli o‘ta olmagani sabab transfer amalga oshmay qolgan.
Oradan vaqt o‘tib, «Real» istiqbolli futbolchi nomzodiga yana qaytishga qaror qilgan.
Joriy Niderlandiya chempionati mavsumida Uazan 7 ta uchrashuv o‘tkazib, 1 ta gol urdi.
Marokashlik futbolchining «Ayaks» bilan amaldagi shartnomasi 2028 yil o‘rtalariga qadar mo‘ljallangan. Transfermarkt portali uning bozor qiymatini 1,5 million yevroga baholamoqda.
