Mundo Deportivo xabariga ko‘ra, «Real» yakshanba kuni «Atletiko»ga qarshi o‘tkazilgan Madrid derbisida ikkinchi bo‘lim boshlanishini kechiktirgani uchun intizomiy jazoga tortilishi mumkin.

Uchrashuv bosh hakami Migel Anxel Ortis Arias bayonnomada ikkinchi bo‘lim mehmon jamoaning maydonga kech qaytishi sabab besh daqiqa kech boshlanganini qayd etgan.

Ushbu holat Ispaniya futbol federasiyasi intizom qoidalarining 89-moddasiga to‘g‘ri keladi. Unga ko‘ra, jamoa maydonga chiqishni kechiktirgan taqdirda klub 3 ming yevrogacha jarimaga tortilishi mumkin.

Biroq Mundo Deportivo ma’lumotiga ko‘ra, «Real» dastlab ogohlantirish bilan cheklanishi ehtimol. Agar bunday holat yana takrorlansa, klubga jarima qo‘llanilishi, bosh murabbiy Joze Mourinyo esa bir o‘yindan uch o‘yingacha diskvalifikasiya qilinishi mumkin.