O‘zbekiston milliy terma jamoasi bosh murabbiyi Fabio Kannavaro shtabiga ikki nafar yangi mutaxassis qo‘shildi.
O‘FA ma’lumotiga ko‘ra, italiyalik Silvano Kotti milliy jamoada fizioterapevt sifatida ish boshlaydi. U katta xalqaro tajribaga ega bo‘lib, faoliyati davomida Italiya va Xitoy milliy terma jamoalari, shuningdek, "Inter", "Milan", "Chelsi" va "Roma" klublarida mehnat qilgan.
Shuningdek, Andrea Yuliano O‘zbekiston milliy terma jamoasi shtabiga sport nutrisiologi sifatida qo‘shildi. Biolog-nutrisiolog va sport ovqatlanishi bo‘yicha mutaxassis avval "Udineze" klubi hamda Shveysariya U-21 terma jamoasi bilan ishlagan.
Yangi mutaxassislar milliy jamoa futbolchilarining jismoniy holatini nazorat qilish, tiklanish jarayoni va sport ovqatlanishi yo‘nalishlarida faoliyat olib boradi.
