La Liganing 7-turidan o‘rin olgan «Atletiko»ga qarshi madrid derbisidan (1:2) so‘ng «Real» yarim himoyachisi Federiko Valverde jarohatining og‘irlik darajasi ma’lum bo‘ldi.

O‘yinning 45-daqiqasida maydon markaziga yaqin joyda maydon egalari xavbeki Li Kan In butsasining shiplari bilan Valverdening to‘piq qismiga bosib oldi. Uchrashuv bosh hakami Migel Anxel Ortis Aryas koreyalik futbolchini jazolamadi. O‘yindan so‘ng «Real» ushbu vaziyatda Valverde to‘pig‘idan jarohat olganini xabar qildi. Hakamlar texnik qo‘mitasi (CTA) Li Kan Inga qizil kartochka ko‘rsatilishi kerak bo‘lganini tan oldi.

«Madrid» bugun Federikoda chap to‘piq bo‘g‘imi boylamlarining 3-darajali cho‘zilishi tashxisi qo‘yilganini xabar qildi.

Klub 28 yoshli urugvaylik futbolchining tiklanish muddatlariga aniqlik kiritmadi, ammo jurnalist Serxio Kirantening xabar berishicha, «Madrid»da Valverde taxminan ikki hafta maydonga tusha olmasligi aytilmoqda. Shu tariqa, u terma jamoalar o‘yinlari sababli yuzaga keladigan tanafsusdan so‘ng safga qaytadi.