«Barselona» yarim himoyachisi Mark Bernal kataloniyaliklar bilan yangi shartnoma imzolashga yaqin turibdi. Tomonlar 19 yoshli ispaniyalik futbolchining bitimini 2031 yilning yozigacha uzaytirishni rejalashtirishmoqda.

Yangi shartnomaning asosiy shartlaridan biri — tovon puli summasini avvalgi darajada, ya’ni 500 million yevro miqdorida saqlab qolish bo‘ladi. «Barselona» rahbariyati bu summani oshirishni lozim topmadi, chunki amaldagi miqdor yosh futbolchining salohiyatini yuqori baholash uchun yetarli deb hisoblaydi.

Bitim tez orada uzaytirilishi haqida avvalroq «Barselona» sport direktori Deku klubning oxirgi assambleyasida ma’lum qilgan edi. Hozirda muzokaralar yakuniy bosqichda. Bernal «Barselona» akademiyasi tarbiyalanuvchisi hisoblanadi va 2024 yilning iyul oyidan beri asosiy jamoada harakat qilib kelmoqda.