«Barselona» sport direktori Deku klub «Manchester Yunayted»ning 15 yoshli iqtidorli futbolchisi Jey-Jey Gabrielga qiziqmayotganini ma’lum qildi.

Avvalroq yosh futbolchi «Barselona», «Real», «Bavariya» va Premyer-liganing bir qator klublari bilan bog‘lanayotgan edi.

Yaqinda Gabriele Barselona shahrida Lamin Yamal bilan birga ko‘rindi. Suratda u Yamalning familiyasi va raqami tushirilgan «Barselona» futbolkasini ushlab turgan edi.

«Yo‘q, bu yerda aytadigan gap yo‘q. Yosh futbolchilarni bizning klub bilan bog‘lashlari odatiy holat. Ammo biz hozirgi vaziyatda turgan futbolchiga qiziqmayapmiz.

U hali ham «Manchester Yunayted» futbolchisi va biz bu jarayonda ishtirok etmayapmiz», — dedi Deku.

Ma’lum qilinishicha, Gabriel «Manchester Yunayted»ga klubni tark etish istagi haqida Angliya Liga kubogidagi «Brayton»ga qarshi o‘yindan bir kun oldin xabar bergan.

Agar u o‘sha bahsda maydonga tushganida, «Manchester Yunayted» tarixidagi eng yosh futbolchiga aylanishi mumkin edi. Shundan so‘ng Gabriel asosiy jamoa bilan mashg‘ulotlarda ishtirok etmay qo‘ygan.