Fransiya terma jamoasining sobiq himoyachisi Rafael Varan yangi bosh murabbiy Zinedin Zidanning futbol falsafasi haqida fikr bildirdi.

«Uning yondashuvida eng asosiy jihat — muvozanatni topish. Zidan hujumkor futbolchilar jamoaga himoyada ham yordam berishini xohlaydi, ammo shu bilan birga ularning hujumdagi erkinligini cheklamaslikka harakat qiladi.

Jamoa to‘pga egalik qilganda u futbolchilarga ko‘proq erkinlik beradi va ularning instinktiga ishonadi. Ayniqsa, kutilmagan harakatlar va improvizasiya Zidan uchun juda muhim.

Bu uning o‘zida ham bor bo‘lgan xususiyat. Shu bilan birga, u futbolchilardagi bunday sifatlarni ham yaxshi ko‘ra oladi va ularning maydonda erkin harakat qilib, o‘z ijodkorligidan foydalanishiga sharoit yaratadi.

Zidan futbolchilar o‘zini maydonda qulay va ishonchli his qilishini istaydi», — dedi Varan.

Fransiya terma jamoasi Zidan boshchiligidagi ilk uchrashuvini 25 sentyabr kuni Turkiyaga qarshi o‘tkazadi. Bahs Toshkent vaqti bilan 23:45 da boshlanadi.