O‘zbekiston milliy terma jamoasi hujumchisi Husayn Norchayev Eronga qarshi uchrashuvdan keyin jurnalistlarning savollariga javob berdi.
"Navbahor" forvardi o‘z golida jamoadoshining hissasini alohida qayd etdi.
"Mahmud juda yaxshi uzatma berdi. Men esa hujumchi sifatida o‘z vazifamni bajardim, deb o‘ylayman", — dedi Norchayev.
Futbolchi Eronga qarshi bahs jamoa uchun muhim sinov bo‘lganini ham ta’kidladi.
"Juda yaxshi o‘yin bo‘ldi. Eron Osiyoning kuchli jamoalaridan biri ekanini yaxshi bilamiz. So‘nggi vaqtlarda ularga qarshi yaxshi natijalar qayd etyapmiz. Bu bizga qo‘shimcha ishonch beradi", — dedi hujumchi.
Norchayevdan terma jamoaning yangi taktik sxemasi va o‘yindagi kamchiliklar haqida ham so‘raldi.
"G‘alaba qozondik. Menimcha, yaxshi o‘yin ko‘rsatdik. Jiddiy kamchiliklar bo‘ldi, deb o‘ylamayman", — deya javob berdi futbolchi.
