Italiya terma jamoasi Millatlar ligasidagi navbatdagi siklni omadsiz boshladi. Jamoa Belgiyaga 0:2 hisobida mag‘lub bo‘ldi. Ushbu natijaga Italiyaning asosiy futbolchilaridan biri Sandro Tonali munosabat bildirdi.

«Ko‘pchilikning kayfiyati tushib ketdi, ammo o‘yindan keyin bo‘ladigan barcha narsani — tribunalardagi hushtakbozlikdan tortib, o‘zimizdagi alamgacha — qabul qilishimiz kerak.

Biz yomon o‘ynadik va mag‘lubiyatga loyiq edik. Yaxshiyamki, uch kundan keyin yana maydonga tushamiz. Biz zudlik bilan o‘zimizga kelishimiz kerak.

Birga ko‘proq vaqt o‘tkazishimiz va haqiqiy jamoaga aylanish ustida ishlashimiz zarur. Bizda o‘yin taqdirini yolg‘iz o‘zi o‘zgartirib yuboradigan yulduz futbolchi yo‘q.

Vaqt o‘tishi bilan kuchli jihatlarimiz o‘zini ko‘rsatishiga ishonaman», — deya Tonalining so‘zlarini derbyderbyderby.it nashri keltirdi.

Eslatib o‘tamiz, Italiya terma jamoasi ketma-ket uchta jahon chempionatini o‘tkazib yuborgan.