«Liverpul» rahbariyati so‘nggi yillarda transfer bozorida bir qator xatolarga yo‘l qo‘yganini tan oldi.

BBC Sport ma’lumotiga ko‘ra, klub ichida ko‘plab yosh va iqtidorli futbolchilarni sotib yuborish noto‘g‘ri qaror bo‘lgani anglab yetilgan. Bobbi Klark, Jarell Kuansa va Tayler Morton so‘nggi yillarda mersisaydliklar tomonidan sotilgan futbolchilarning bir qismi, xolos.

Manbaga ishonilsa, «Liverpul» 2020 yildan buyon yosh futbolchilar savdosidan qariyb 270 million yevro ishlab topgan. Biroq klub hozir asosiy jamoaning kelajagi uchun yetarli kadrlar zaxirasi qolmaganini tushunib yetgan.

Shu sababli yaqin vaqt ichida «Liverpul» bu muammoni hal qilish maqsadida Angliya va boshqa mamlakatlardan 21 yoshgacha bo‘lgan eng iqtidorli futbolchilarni o‘z safiga jalb qilishni rejalashtirmoqda.

Angliya Premyer-ligasining besh turidan keyin «Liverpul» 9 ochko bilan turnir jadvalida oltinchi o‘rinni egallab turibdi.