«Barselona» qishki transferlar oynasida birinchi navbatda qaysi pozisiyani kuchaytirishni rejalashtirayotgani ma’lum bo‘ldi.

Diario SPORT xabariga ko‘ra, kataloniyaliklar qishda himoyaning chap qanotini kuchaytirish niyatida. Biroq klub asosan shartnomasi yakunlanish arafasida turgan futbolchilarga e’tibor qaratmoqda. Bu orqali «Barselona» ular bilan yozda erkin agent sifatida tekin transfer bo‘yicha kelishib olish imkoniyatini ko‘rib chiqmoqda.

Manba ma’lumotiga ko‘ra, ayni paytda «Barselona» ro‘yxatida «RB Leypsig» sardori David Raum va «Kristal Pelas» himoyachisi Tayrik Mitchell bor. Har ikki futbolchi ham hozircha o‘z klublari bilan shartnomasini uzaytirmagan.

«Barselona» Ispaniya La Ligasining yetti turidan keyin 21 ochko jamg‘arib, turnir jadvalida peshqadamlik qilmoqda.