«Komo» bosh murabbiyi Sesk Fabregas Italiya A Seriyasining 6-turidan o‘rin olgan «Roma»ga qarshi uchrashuvdan keyin o‘z fikrlari bilan o‘rtoqlashdi.

Mazkur bahsda jamoalar gol ura olmadi va uchrashuv 0:0 hisobidagi durang bilan yakunlandi.

Ispaniyalik mutaxassis «Roma»ga qarshi o‘yinga tayyorgarlik jarayonida raqibning avvalgi uchrashuvlarini tahlil qilganini ta’kidladi.

«Menimcha, Gasperini jamoasiga eng ko‘p qiyinchilik tug‘dirgan jamoa Simone Indzagi davridagi «Inter» edi. Shuning uchun o‘sha uchrashuvlardagi ayrim taktik jihatlarni o‘rganib, o‘zim uchun kerakli g‘oyalarni oldim», — deya Fabregasning so‘zlarini keltiradi DAZN.

«Komo» ustozi ikki jamoaning hujumkor o‘yin uslubiga qaramay, uchrashuvda gol urilmaganiga ham munosabat bildirdi.

«Futbol ba’zan haqiqatan ham tushunarsiz bo‘ladi. Hujumkor futbol namoyish etadigan ikki jamoaning 0:0 hisobida durang o‘ynashi g‘ayrioddiy holat.

«Roma»ga qarshi munosib kurashish uchun kuchli xarakterga ega bo‘lish kerak. Agar faqat taktikaga e’tibor qaratib, to‘p bilan o‘ynashga jur’at etmasangiz, ochko qo‘lga kirita olmaysiz», — dedi Fabregas.

Ushbu uchrashuvdan keyin «Komo» 11 ochko bilan Italiya chempionati turnir jadvalida oltinchi o‘rinni egallab turibdi. «Roma» esa 14 ochko jamg‘argan holda uchinchi pog‘onadan joy olgan.