Матбуот анжуманининг иккинчи қисмида “Навбаҳор” жамоасининг маслаҳатчи мураббий Ислом Аҳмедов журналистларнинг саволларига жавоб қайтарди:
“Биринчи ўйин ҳар доим қийин кечади. Гувоҳи бўлганларингиздек, иккита оддий хато қимматга тушди. Ўз навбатида футболчиларимиз рақиб дарвозаси олида яратилган имкониятларни голга айлантира олишмади. Чемпионатнинг биринчи ўйини бўлгани боис дастлабки 45 дақиқаликда футболчиларимизнинг ҳаракатлари ўхшамади. Йигитларда хаёжон кузатилди.
Танаффусдан кейин ҳужумкорликни ошириб, рақиб дарвозаси олдидаги босимни оширдик. Лекин, вазиятлардан фойдаланишда оқсаш кузатилди. Жамоани ёмон ўйнади десак хато бўлади. Футболчиларимиз ижобий натижани қўлга киритиш учун интилишди. Йигитлар яхшигина устунликка эришишди. Шундай бўлсада, натижа кутганимиздек бўлмади. Фурсатдан фойдаланиб, “Машъал” жамоасини ғалаба билан табриклайман. Негаки, меҳмонда уч очкони қўлга киритиш қийин. Мағлубиятга сабаб сифатида омадсизликни кўрсатиш мушкул. Хатолар устида ишлашимиз керак. Ўйинда йўл қўйилган хатоларимизни ўрганиб чиқиб уларни бартараф этиш борасида иш юритамиз.
Айни пайтда ҳаммасини ёмон деб аташ нотўғри. Бу футбол. Негаки, йигитларимизни ҳаракатларини кўрдинглар. Айниқса футболчиларимизнинг иккинчи бўлимдаги ҳаракатларидан қониқиш ҳосил қилдим. Агарда футболчиларимиз машғулотлардаги ҳаракатларни майдонда кўрсата олишса кейинги турлардаги натижаларимиз албатта ижобий кўриниш олади деб ўйлайман”.