Олий лиганинг 2-туридан ўрин олган "Локомотив" - "Нефтчи" (1:1) баҳси якунига етгач, "темирйўлчилар" мураббийи Марат Мифтахутдинов ўз фикрларини билдирди.

— Биз бу ўйинда ғалаба қозонишимиз керак эди, аммо бир қанча вазиятлардан фойдалана олмаганимиз учун дуранг қайд этдик. Биринчи бўлимнинг ўзида кўпроқ гол уришимиз лозим эди. Ҳисоб тенглашганидан кейин ҳам имкониятлар бўлди, лекин ғалаба қозона олмадик.

Вадим Абрамовнинг ўйинга келмагани хусусида
— Вадим Карленович бетоблиги сабаб касалхонада ётибди. Жамоа усиз ҳам яхши ўйин кўрсатди, кўплаб вазиятларга эга бўлди. Бу ўйинни Абрамовсиз ҳам ютишимиз керак эди.

Вазиятлардан фойдалана олмаслик ҳақида
— Балки футболчиларимиз кўп ҳолларда шошиб қолаётгандир, лекин ўйинни кўрдинглар, ғалаба учун имконият етарлича бўлди. Қандай қилиб футболчи 2-3 метрдан тўп кирита олмаслиги мумкин? Буни ҳеч тушунмаяпман.