Олий лига 2-тур учрашуви “Олмалиқ” – “Насаф” ўйинидан кейин ташкил этилган матбуот анжуманининг иккинчи қисмида мезбонлар бош мураббийи Игорь Шквирин иштирок этди.

— Ғалаба қозондик ва бу жуда яхши. Бу учрашувга жиддий тайёргарлик кўргандик ва “Насаф”нинг ўйинини жуда яхши ўргангандик. Ўйин давомида бир қатор гол уриш учун вазиятлар яратдик. “Насаф” мамлакатимиздаги яхши шаклланган жамоа ҳисобланади. Уларда яхши захира мавжуд. Таркибдан келиб чиқиб шуни айтиш мумкинки, қаршиликлар ёмон футбол ўйнашмаяпти. Уларни икки фронтда кураш олиб бораётганликлари ўз сўзини айтаётган бўлиши мумкин. Узоқ парвозлар жамоани бироз чарчатиб қўйганга ўхшайди. Лекин бу футбол ва бу йўлни ўзимиз танлаганмиз. Шу боис бу борада арз қилишга ҳожат йўқ деб ўйлайман.

– “Олмалиқ” ҳар қандай кучли жамоани жазолашга қодир, нега ўз олдиларингизга юқори мақсадларни қўймайсизлар?
– Ким айтди сизга жамоа олдига юқори вазифалар қўйилмайди деб? Аввалги мавсумларни инобатга оладиган бўлсак, унда бошқа вазиятлар кузатилган. Масалан, 2002 йилда жамоа умуман олий лигада иштирок этмаган. Бу шунчаки мисол. Биз кеча билан эмас, бугун билан яшаймиз. Ҳозирга келиб эса клуб раҳбарияти олдимизга аниқ вазифа қўйган. “Олмалиқ” бу мавсумда ОЧЛга йўлланма берадиган ўринларни бирини қўлга киритиши лозим. Шунга қараб таркибимизда кўплаб ўзгаришлар қилинди ва баъзи футболчиларни ўз сафимизга қўшиб олдик. Жамоамизга янги қон қўйилди десам ҳам бўлади. Асосийси ўзимиз истаган ва бизга керакли футболчиларни жамоага олдик. Умид қиламизки, бу йигитлар ишончни оқлашади. Шунингдек, яна тўрт футболчимиз олимпия терма жамоасига жалб қилинган. Жамоамиз янада шаклланишда давом этади. Сизларни ишонтириб айтаманки, мавсум сўнггига келиб бунақа ўйинчиларимиз сони янада кўпаяди.