"Манчестер Юнайтед" клуби ва Англия терма жамоаси яримҳимоячиси Майкл Кэррик "Тоттенҳэм" ҳужумчиси Гарри Кейн ҳақида фикр билдирди.
Эслатиб ўтамиз, 21 ёшли англиялик футболчи 19 гол билан АПЛ тўпурарлари рўйхатини бошқариб бормоқда.
"Менимча, Кейн ақлбовар қилмас ўйин кўрсатмоқда. Унинг мавсум бошидаги ва ҳозирги ўйинини солиштирсак, катта даражани босиб ўтганини кўрамиз. Мени қойил қолдирган нарса - шунча эътибор ва машҳурликка қарамасдан ўз устида ишламоқда ва ўсмоқда.
У Англия термасига чақирилгандан сўнг "Лестер" билан ўйинда "хет-трик"га эришди. Менга шундай туюляптики, унга босим ёқади ва ривожланмоқда. Шундай бўладики, баъзи ўйинчилар бир қатор яхши ўйин кўрсатиб, кейин ҳаволаниб кетади, аммо Кейнга бу нарса бегона", - дейди Кэррик.
