Жанубий Корея футбол ассоцияцияси хабарига кўра, 27 март куни Жанубий Корея ва Ўзбекистон терма жамоалари ўйинидан аввал ўзига хос аксия ўтказиш режалаштирилмоқда.

Режага кўра, ўйин бошланиши арафасида иккала терма жамоа аъзолари майдон марказида доира шаклида йиғилишади ва февраль ойида оққон касалига учраганлиги туфайли Жанубий Корея олимпия терма жамоасидан истеъфога чиққан мураббий Ли Кванг Жонгнинг катта суратига қарата 10 сония давомида қарсак чалинади. Бу далда қарсаклари корейс мураббийига руҳий мадад бериш мақсадида уюштирилмоқда.

Жанубий Корея терма жамоаси сафидаги кўпчилик футболчилар турли йилларда Ли Кванг Жонг қўли остида шуғулланган. Шунингдек, Ўзбекистонга қарши майдонга тушадиган асосий таркиб футболчилари Ли Кванг Жонгга қарата яхши ниятлар битилган футболкаларда эсдалик учун расмга тушишлари ҳам режалаштирилмоқда.

Касаллик билан курашаётган Ли Кванг Жонг ўтган йили Инчонда ўтган Осиё ўйинларининг футбол мусобақасида жанублик корейсларга мураббийлик қилган ва мусобақа олтин медалларига эришишгач, мамлакат олимпия терма жамоаси ҳам унга ишониб топширилган эди. Лекин февралда Таиландда ўтган Қирол Кубоги турнири чоғида мазаси қочиб, Кореяга қайтишга мажбур бўлганди.

Отабек Йўлдошев
Жанубий Корея, Сеул