Бугун Жанубий Корея - Ўзбекистон ўйини олдидан жамоа мураббийлари футболчилар иштирокида матбуот анжумани ўтказилди. Жанубий Корея терма жамоаси бош мураббийи Ули Штилике шогирди Ку Жа Чол билан қатнашди.

"Аввало матбуот анжумани залини тўлдириб турганингиз учун сизлардан миннатдорман. Эртанги ўйиндан умидларимиз катта. Кеча футбол мухлислари учун очиқ машғулотлар ўтказдик. Эртага стадион лиқ тўлишини таҳмин қиляпман.

Энди футболчиларнинг ҳолатига баҳо берадиган бўлсам, Ким Ун Сондан ташқари барча футболчилар майдонга тушишга шай. Жи Донг Вон "Аугсбург"дан жароҳати билан келди. Лекин у эртага захира ўриндиғида ўтиради. Вазиятга қараб, Янги Зеландияга қарши ўйинда майдонга туша олади. Эртанги ўйинда олдинги чизиқда ягона номинал хужумчимиз Ли Жонг Хёбга катта масъулият тегиши аниқ. Унга алоҳида бир махсус кўрсатма берганим йўқ. У эртага бутун корейс миллати кўз ўнгида ўйнайди. Ўзини кўрсатиши керак", - дейди Ули Штилеке.

Отабек Йўлдошев
Жанубий Корея, Сеул