Ули Штилике билан бирга матбуот анжуманида қатнашган Германиянинг «Майнц» клуби аъзоси Ку Жа Чол туғилиб ўсган шаҳри Теджонда терма жамоа ўйини ўтказилаётганидан мамнунлигини яширмади:

«Болалигим ўтган Теджонда терма жамоа либосида тўп суриш бахти насиб этганидан хурсандман. Ёш бола пайтларимизда бу стадионга кўп келардим ва қачонлардир терма жамоа сафида тўп суришни орзу қилардим.

Эртага бизни қийин ўйин кутиб турибди. Ўзбекистон яхши ўйин ўтказадиган жамоа. Осиё Кубогида кўп ўйнай олмаган бўлсам ҳам ҳозир ўйинларга ташнаман. Осиё Кубогидан кейин жароҳатларга ўралашиб қолгандим. Энди ҳамма кўнгилсизликларни унутиб эртанги ўйинга тайёр бўлишимиз керак. Эртага бор кучимни аямайман».

Журналистларнинг февраль ойида бутун дунёга шов-шув бўлган Тоҳир Шамсиддинов воқеасига муносабатини сўрашганида Ку Жа Чол қисқагина қилиб: «Бу ҳолатни эртанги ўйинга боғлаш ниятим йўқ. Лекин ўзбек футболчиси бу ҳаракати билан профессионал футболчига хос иш тутди деб ўйламайман. Бундай воқеалар қайта такрорланмаслигини истардим. Футболчи ўз айбини билиши лозим. Ўзбек футболчиси мушт кўтарган ҳолатлар футбол майдонида учрамаслиги керак», - дея жавоб қайтарди.

Отабек Йўлдошев
Жанубий Корея, Сеул