Kun.uz: Россия футбол уюшмаси президенти Николай Толстих УЕФАга Евро-2016 саралаши доирасидаги Черногория ва Россия терма жамоалари ўйинида юз берган жанжалли ҳолат ва бунга ташкилотнинг муносабати юзасидан шикоят хати билан чиқиш ниятида эканини маълум қилган.
“Биз ўйин делегатига ўйинни илк дақиқада Игор Акинфеевга петарда отилган пайтдаёқ тўхтатиш зарурлиги бўйича кўрсатма бердик. Футболчилар ҳам, мураббийлар ҳам шу фикрда эди. Лекин УЕФА аксинча йўл тутди ва натижада кейин бўлиб ўтган ишлар ҳаммага маълум. Биз ўйин тўхтатилмаса, шикоят хати билан чиқишимиз ҳақида огоҳлантирган эдик”, дейди Толстих.
Эслатиб ўтамиз, бу ўйинда мухлислар меҳмонлар дарвозабонига петарда улоқтириб уни жароҳатлашди. Уни майдондан олиб чиқиб кетишгач, ўйин давом эттирилди, лекин 67 дақиқада навбатдаги жанжал келиб чиқди ҳамда ўйин бутунлай тўхтатилди.
