"Олмалиқ" ҳимоячиси Адриан Кашкавал куни кеча Молдова терма жамоаси сафида Евро-2016 саралаш босқичи доирасида Швецияга қарши ўйинда иштирок этди. У Moldfootball.com сайти мухбирига интервью бериб, мазкур ўйин ва клубдаги ишлари борасида ўз фикрларини билдириб ўтди.

— Швеция терма жамоаси кучли жамоа эканини барчамиз биламиз. Шунингдек, ушбу жамоада таниқли ҳужумчи Златан Иброҳимович ўйнайди. Молдова уларга қарши ҳимоявий ўйин қилди. Балки қарши ҳужумга тезкорлик билан ўта олмагандирмиз. Терма жамоа ҳимояси бу ўйинда яхши ўйнади. Ўтказиб юборилган биринчи голдаги вазият ҳар доим, ҳар қандай жамоада содир бўлиши мумкин. Бундай гол кеча бизнинг дарвозамизга кирди. Буни тезроқ унутиб, олдинга ҳаракат қилишимиз керак. Гуруҳда курашиш осон бўлмайди, аммо учинчи ўрин учун имконият ҳали бор.

— Клубдаги ишларингиз қандай кечяпти?
— "Олмалиқ"даги ишларим жойида. Ажойиб клуб ва яхши жамоа йиғилган. Олдимизга Чемпионлар лигаси йўлланмасини қўлга киритиш вазифаси қўйилган. Мавсум энди бошланди, иккита тур ўйинлари ўтказилди. Ҳар иккала ўйинда тўлиқ иштирок этдим. Жамоада менга ишонч билдиришяпти, мен асосий таркиб футболчисиман. Чемпионатда "Насаф" дарвозасига битта гол урдим, аммо тушунарсиз сабабларга кўра, дарвозабон ҳисобига автогол сифатида ёзишди.