Эртага Япония ва Ўзбекистон миллий терма жамоалари ўзаро ўртоқлик ўйинида майдонга тушишади. Бугун эса жамоалар бош мураббийлари иштирокида матбуот анжумани ўтказилди. Япония бош мураббийи Воҳид Халилходжич майдонга фақат ғалаба учун тушишини таъкидлаб ўтди.
"Япония терма жамоасида иш бошлаганига ҳали кўп вақт бўлмади. Тунисга қарши биринчи ўйина ғалаба қозонганимиздан хурсандман. Ўзбекистонга қарши бўладиган иккинчи ўйинда ҳам ғалаба қозонишга ҳаракат қиламиз. Бунинг учун ўз ўйинимизни кўрсатишимиз керак бўлади.
Балки, биринчи ўйинга нисбатан эртага таркибда айрим ўзгаришларни қилишим мумкин. Кеча футболчиларнинг чарчоқдан қай даражада тикланаётганини ўргандик. Йиғинга кеч қўшилган футболчилардан фойдаланишга ҳаракат қиламан. Йиғин давомида иложи борича кўпроқ футболчиларни синовдан ўтказиб олишимиз керак.
Ўзбекистон терма жамоаси ҳақида тўхталиб ўтадиган бўлсам, сўнгги марта улар бизни ўз майдонимизда ютиб кетишган экан. Бу сафар эса биз ғалаба қозонишга ҳаракат қиламиз. Ўзбекистон эртага ҳимоявий ўйин қилиб, қарши ҳужумда ўйнашга ҳаракат қилса керак. Биз эса ҳимояда ҳам мустаҳкам ўйнаб, ҳужумда тажовузкор ўйин қилишимиз лозим. Ҳимоядан ҳужумга ўтиш тезкорлигимизни оширишимиз керак. Бунда эса узатмаларнинг аниқлигига катта эътибор қаратишимиз лозим", - дейди Халилходжич.
