Kun.uz: 30 март куни Ўзбекистон миллий терма жамоасининг собиқ бош мураббийи Рауф Инилеев “Футбол шарҳи” кўрсатуви меҳмони бўлди ва ўзбек футболида ҳужумчилар муаммоси ҳақида фикрларини билдирди.

“Футболимиздаги ҳужумчилар муаммоси илдизи болалар футболига бориб тақалади, деб ўйлайман. Ҳамма гап шундаки, болалар билан ҳам худди катталар билан бўлганидек талабчанлик билан иш олиб борилади. Улардан натижа талаб қилинади ва индивидуал маҳоратни ўстиришга деярли эътибор берилмайди. Бу эса тўпурарлик хислатларининг йўқолиб боришига олиб келмоқда. Ўзбек футболи ҳар доим кучли ҳужумчилар билан танилиб келган – Красницкий, Абдураимов, Федоров…

Аммо ҳозирда ҳужумчилар билан мақтана олмаймиз. Бу муаммони бартараф этиш учун кенг кўламда иш олиб бориш керак. Ўзингиз бир ўйлаб кўринг, терма жамоада дарвозабонлар муаммоси ҳақида гапирилганди, алоҳида дарвозабонлар мураббийи лавозими жорий этилди. Жисмоний тайёргарлик оқсагани ҳақида танқид қилинганидан кейин жисмоний тайёргарлик бўйича мураббийни ишга олдик.

Шундай экан, нима сабабдан ҳужумчилар билан ҳам алоҳида мураббий ишламаслиги керак? Масалан, бошқа жойларда шунақа амалиёт мавжуд. Ўз вақтида кучли ҳужумчи бўлган мураббий Игорь Шквирин Россиянинг “Крилья Советов” клуби устози Тархановга ёрдам берганида айнан ҳужумчилар билан ишлаган эди. Бизда ҳам шундай лавозим жорий этадиган вақт етиб келди, деб ўйлайман”, – деб фикларини баён этади Рауф Талгатович.