Тошкентдаги “Ўзбекистон” спорт мажмуасида 1 апрель, чоршаба куни қиличбозлик бўйича ёшлар ва ўсмирлар ўртасидаги жаҳон чемпионатининг тантанали очилиш маросими бўлиб ўтади. Бу ҳақда “Правда Востока” хабар бермоқда.

Хабар беришларича, мусобақада 104 давлатдан 1,2 мингдан ортиқ спортчи иштирок этади. “Ўзбекистон” ва Универсал спорт мажмуаларида бўлиб ўтадиган мусобақалар учун Халқаро қиличбозлик федерацияси (FIE) 30дан ортиқ қиличбозлик йўлакчаларини тақдим этган, уларнинг 12таси “Пахтакор” стадионидаги қиличбозлик залига жойлаштирилган.

Қайд этишларича, спортчиларнинг истиқомат қилиши учун Тошкентдаги 16 меҳмонхонада жойлар банд қилинган. 250дан ортиқ таржимонлар, кўнгиллилар (волонтёрлар) жалб қилинган. Мусобақага 50ка яқин расмий шахслар, халқаро тоифадаги 46 нафар ҳакам таклиф этилган. Чемпионат доирасида 24 мамлакат вакиллари иштирокида ўқув-машғулот йиғинлари ўтказиш режалаштирилган.

Режа бўйича, мусобақа иштирокчиларини Самарқандга экскурсияга олиб бориш режалаштирилган. “Мусобақанинг боришини юздан ортиқ маҳаллий ва хорижий журналистлар кузатиб боришининг ўзи ҳам унга бўлган эътиборнинг катталигини кўрсатади. Баҳсларни Euronews ва Eurovision ходимлари трансляция қилишади”, – дейилади “Правда Востока” хабарида.