Ўзбекистон ва Янги Зелендия ёшлар терма жамоалари ўртасидаги баҳс якунига етганидан сўнг меҳмонлар устози Даррен Базели билан “Рухсор” ТРК ижодкорлари суҳбат қуришга муваффақ бўлишди. Айтиш керакки, махаллий ОАВ вакиллари билан мураббий жуда ҳам самимий тарзда интервью жараёнини амалга оширди.
— Аввало Фарғона вилоятига хуш келибсиз! Марҳамат, ўйин борасидаги фикрларингиз билан ўртоқлашсангиз?
— Раҳмат. Бугун Янги Зеландия учун қийин ўйин кечди. Бироқ шогирдларимнинг ўйинидан қониқиш хосил қилдим. Камчиликлар кўп ва улар устида ишлаймиз.
— Жаноб Базели, Ўзбекистон ёшлар терма жамоаси ҳақида фикрларингиз ?
— Бугунги ўйиндаги Ўзбекистон жамоаси менга жуда ёқди. Рақибнинг хар бир чизиғида кучли ва иқтидорли футболчилар бор. Иккинчи ўйин ҳам мана шундай қизиқ ўтишидан умид қиляпман. Уларга бўлажак ЖЧда омад тилайман. Балки мундиалда яна кўришиб қолармиз.
— Бугун “Истиқлол” стадиони биринчи ўйинни ўзида қабул қилди. Мазкур арена борасида нима дея оласиз? Сизга ёқдими?
— Ҳа, бугун биринчи ўйин эканлигини эшитдим. Тўғрисини айтаман, футбол соҳада ишлаб бундай кўркам стадион кўрмаганман. Шароитлар ҳам аъло даражада. Умумий қилиб айтганда, “Истиқлол” менга ёқди.
— Фикрингизча Ўзбекистон ЖЧда қаергача бора олади?
— Очиғи, саволингизга аниқ жавоб айтиш қийин. Балки ярим финалгача борар. Буни аниқ айта олмайман. Лекин Ўзбекистоннинг гуруҳидаги рақиблари кучига тўғри баҳо бера олсам, ўзбеклар албатта гуруҳдан чиқа олишади деб ўйлайман.
Ҳожиакбар Жабборов суҳбатлашди.
“Рухсор” ТРК.
