“Барселона” раҳбарияти ва мураббийлар штаби ярим ҳимоячи Хави Эрнандес билан мавсум якунланганидан сўнг хайрлашишни исташмаяпти. Бу ҳақда Испаниянинг Sport нашрига таяниб championat.com хабар қилмоқда.

Манба маълумотига кўра, каталон клуби президенти Хосеп Мария Бартомеу сўнгги кунларда Испания термасининг собиқ ўйинчиси билан бир неча марта суҳбатлашган ва ундан шартномасини охиригача етказишини сўраган. Агар Хави барибир клубини ўзгартиришга қарор қилган бўлса, Бартомеу ундан 2016 йил январигача жамоада қолишни сўраган. Айнан ўшанда ФИФАнинг “Барселона”га қарши киритган санкцияси муддати тугайди ва жамоа янги футболчиларни рўйхатдан ўтказиши мумкин.

Олдинроқ Хави Қатарнинг “Ас-Садд” клуби билан шартнома тузгани ҳақида маълумотлар берилганди. Аммо ўйинчининг ўзи бу хабарларни рад қилди.