Матбуот анжуманининг иккинчи қисмида мезбонлар бош мураббийи Рўзиқул Бердиев ўйин ҳақида ўз фикрларини билдириб ўтди.

– Бугунги ўйинимиз билан ғалабага лойиқ эмасдик. Рақиб бизга жиддий қаршилик кўрсатди. Ҳамма футболчиларимиз ҳаяжонланиб ўйнади. Плей-оффга чиқиш учун ҳали имкониятимиз бор.

— Сиздан бугун туб ўзгариш кутгандик. Жамоа Дубайдаги учрашув билан бир хил тактикада ўйнади...
– Рақиб ўйинини ўрганган ҳолда иш олиб боргандик.

— Геворкян аввалги ўйинини топа олмади. Нега алмаштирмадингиз?
– Жароҳат туфайли у анча вақт машғулотда иштирок эта олмади. У стандартдан яхши фойдаланадиган ўйинчи бўлгани учун охиригача ушладик. Захирадан тушган ўйинчилар ўйинимизни кучайтира олишмади. Рақибда эса аксинча ҳолат.

— Баҳром Абдураҳимов “Қўқон”га қарши ўйиндагидек ўйнай олмади.
– “Қўқон-1912″ билан “Ал Аҳли” жамоасини солиштириш нотўғри, деб ўйлайман. Бугунги жамоа савияси анча юқори эди.

— Гуруҳдан чиқишга жамоангиз имкониятини қандай, деб ҳисоблайсиз?
– Бугунги мағлубиятдан сўнг имкониятимиз кескин пасайди. Шундай бўлса-да, биз охиригача курашамиз.