Россия миллий терма жамоаси бош мураббийи Фабио Капелло сўнгги йилларда “Олтин тўп” учун асосий даъвогар бўлиб келаётган Лионель Месси (“Барселона”) ҳамда Криштиану Роналду (“Реал”)ни ўзаро қиёслади ва Неймарнинг (“Барселона”) имкониятларига ҳам баҳо бериб ўтди. Италиялик мураббий фикрича бразилиялик футболчи ҳали ёш, аммо у Португалия терма жамоаси етакчисидан майдондаги фантазия борасида устунроқ.

– Месси майдонда кўплаб фантазияларни ишлата оладиган бошқа сайёранинг ўйинчиси, – дея Капелло сўзларини келтиради “СЭ”. – У кучли ижодкор ўйинчи. Мессидек алдаб ўтиб кетишни ҳеч ким эплай олмайди.

– Криштиану Роналдуга келсак, у иккала оёқда ва бошда жуда яхши ўйнай оладиган ҳақиқий тўпурар. Унинг тезлиги жуда юқори.

– Неймар? У Криштиану Роналдудан ҳам салоҳиятлироқ, лекин ҳали ёш ва ўсишда давом этиши лозим.