KUN.UZ: WBA йўналиши бўйича жаҳон чемпиони Руслан Чагаевнинг промоутери Тимур Дугазаев Пуэрто-Рико вакили Фрес Окендо билан жанг қайтадан ўтказилмаслигини таъкидлади.

Маълумки, ўтган йили икки боксчи Чеченистон пойтахти Грознийда юзма-юз келган бўлиб, очколар ҳисобига ўзбекистонлик боксчи ғалабани қўлга киритган эди. Аммо яқинда Нью-Йорк суди учрашув қайта ўтказилиши кераклиги, акс ҳолда Руслан Чагаев чемпионлик унвонидан маҳрум қилиниши тўғрисида қарор чиқарди.

Тимур Дугазаевнинг фикрича, Нью-Йоркдаги суд бу масалада қарор чиқариши мумкин эмас: “Руслан ва Окендо ўртасидаги жанг Грознийда ўтказилди, у ҳудуд эса Москва юрисдикцияси остида. Жангдан сўнг унинг допинг истеъмол қилгани аниқланганига қарамай, Окендо 225 минг доллар миқдоридаги гонорарини тўлиқ олди. Ҳеч қандай матч-реванш бўлмайди. Окендога имконият берилган эди, аммо у мағлубиятга учради. Лекин у шантаж йўлига ўтиб олди. Бундай одамларни дисквалификация қилиш керак”.

vRINGe.com сайтида ёзилишича, Чагаевнинг кейинги учрашуви июннинг охирида ўтказилади, лекин унинг рақиби ҳозир номаълум.