"Реал Мадрид" Испания чемпионатининг навбатдаги тур баҳсини "Малага"га қарши ўтказди ва ўз ҳисобига 3 очкони қўшиб қўйди. Аммо бу ғалаба осонликча қўлга киритилгани йўқ. Қўшиб берилган дақиқаларда ҳам интрига сақланиб турганди.
Учрашувнинг бошидаёқ Гарет Бэйл жароҳат олиб, майдонни тарк этди. Унинг ўрнига тушган Чичарито эса жамоасининг сўнгги голида иштирок этди.
Биринчи бўлим ўрталарида Роналду чап қанотдан жарима тўпини ўйинга киритди, офсайдда турган Рамос дарвозани ишғол қилди. Ҳакамлар голни инобатга олишди. "Малага" мазкур голгача ҳам ишончли ўйнаётганди, ундан кейин ҳам дадил ўйнашда давом этди. Баҳснинг 36-дақиқасида Дардер 11 метрлар масофадан Касильяс дарвозасига аниқ зарба бера олмади.
Иккинчи бўлим ўрталарида Хамесга нисбатан қоидабузарлик учун "Малага" дарвозасига пенальти белгиланди. Роналду эса кучли зарба билан дарвоза устунини нишонга олди! Орадан бир дақиқа Хамес жарима майдончаси ташқарисида Иско билан "девор" ўйнаб олди ва 17 метрлардан кучли зарба йўллаб, орадаги фарқни 2та тўпга оширди. Меҳмонлар эса тезда битта жавоб қайтаришди. Росалес ўнг қанотдан узатма берди ва Хуанми бош билан дарвозани ишғол қилди. 2:1.
Бу кеча Роналду бирибир ўз мақсадига эришди. Компенсация вақтида Чичарито ўнг қанотдан жарима майдончасига кириб келди ва Криштиануга "нонни чайнаб, оғзига солиб берди". "Реал" футболчиси бўш дарвозани ишғол қилиб, Ла лиганинг мазкур мавсумидаги голлари сонини 39тага етказди. Орадан бир дақиқа ўтиб Криштиану яна битта гол уриши мумкин эди, аммо у ўткир бурчак остида бўш дарвозани ишғол қила олмади.
Ушбу ғалабадан кейин "Барселона" ва "Реал" орасидаги фарқ яна 2 очкони ташкил қилмоқда. Чемпионлик кураши давом этади.
Ла лига, 32-тур
Реал Мадрид – Малага 3:1 (1:0, 2:1)
Голлар: 1:0 – 24 Рамос, 2:0 – 69 Хамес, 2:1 – 71 Хуанми, 3:1 – 90 Роналду.
Реал Мадрид – Касильяс, Арбелоа (Карвахаль, 76), Рамос, Пепе, Марсело, Иско, Хамес, Кроос, Бэйл (Эрнандес, 5), Модрич (Ильярраменди, 60), Роналду.
Малага – Камени, Санчес, Анхелери, Росалес, Бока, Кастильехо (Орта, 81), Ресио (Тиссоне, 75), Саму, Дардер (Дуда, 87), Амрабат, Хуанми.
Огоҳлантиришлар: Арбелоа (61), Санчес (77), Кроос (81), Тиссоне (87).
