Бугун тунда Италиа «А» сериясининг навбатдаги турида мухлислар «Милан» дербисига гувоҳ бўлишади. Бу сафарги дербига ҳар иккала жамоа ҳам унча юқори бўлмаган кайфиятда етиб келишди. Турнир жадвалида «Милан» - 9, «Интер» - 10-ўринларда боришмоқда. Сўнгги пайтларда Милланинг ҳар иккала клуби ҳам бирданига инқирозга тушиб қолмаган эди. Бу йил эса уларнинг ҳар иккиси ҳам ўртамиёна клублар сафига қўшилдилар.

Турнир жадвалига назар солсак Милан жамоаларидан «Женоа», «Торино», «Сампдория» сингари клублар ҳам олдинда боришмоқда. Демак Миланликларнинг савияси ўртамиёна жамоаларники билан тенглашиб қолибди деган гапимиз ўз тасдиғини топмоқда.
Бугун ким гўлиб чиқади? «Милан»ми ёки «Интер»? Инзагими ёки Манчини?

Манчинининг қайтиши ҳам «Интер»га ёрдам бермаяпти. Клуб бир текис ўйин намойиш қила олмаяпти. «Милан»ни ҳозирги таркиби билан хаттоки Моуриньо ҳам кучли тўртликка кира олмаган бўларди. Инзаги «борини бозор» қилмоқда. Бироқ унга тажрибанинг камлиги панд бермоқда. Яхшиямки Филиппони клуб раҳбарияти қўллаб-қувватламоқда. Агар у Англиянинг бирор суперклубида шундай натижа қайд этиб турганида ҳозир Американинг бирор сўлим гўшасида дам олиб юрган бўларди.

Милан клубларининг бунақа омадсизликлари чемпионат савиясини ҳам тушириб юбормоқда. «Ювентус» рақобатдан ҳоли. «Наполи», «Лацио» ва «Рома» Туринликларга қаршилик кўрсатишни эплай олишмаяпти. Агар Миланнинг икки жамоасидан ҳеч бўлмаганда биттаси олдинги ҳолига қайтмаса «А» серия «Ювентус»нинг монархиясига айланиб қолиши ҳеч гап эмас.

«Милан» ва «Интер» қайси поғоналарда боришларидан қатъий назар «Милан дербиси»нинг қадри йўқолмайди. Аммо Италия футболи равнақи учун ҳам бу икки жамоа ўзларини ўнглаб олишлари лозим. Бугун ким ғолиб чиқади? Бу саволга бугун тунда жавоб оламиз. Ҳар иккала жамоанинг ҳам имконияти бир хил. Ўйинда дуранг натижа қайд этилиса ажабланмаган бўлардим.

Фурқат Юсупов