Ўзбекистоннинг мини-футбол бўйича диабетиклар терма жамоаси ҳар йили ўтказиладиган Европа очиқ чемпионати “DiaEuro2015”га тайёргарлик кўришни бошлади. Чемпионат Руминиянинг Клуж-Напока шаҳрида 2015 йилнинг 19–26 июль кунлари бўлиб ўтади, деб хабар беради Kun.uz.
Мусобақа қанд касаллиги муаммолари ҳақида хабардорликни ошириш, соғлом турмуш тарзини оммавийлаштириш, бутун жаҳон бўйлаб диабетик ташкилотлар ўртасидаги ҳамкорликни мустаҳкамлаш, халқаро даражада ўзаро ҳаракатларни яхшилаш ва ижобий тажрибани тарқатишга қаратилган.
Ўзбекистон терма жамоаси қанд диабетига эга ногирон болаларнинг Тошкент шаҳар “СофДил” жамияти аъзоларидан ташкил топган. Бу жамият 20 йилдан ортиқроқ вақтдан бери бу ташхисга эга болалар ва ўсмирларни бирлаштириб келмоқда, уларга жамиятга мослашув ва меҳнат реабилитациясининг самарали механизмини яратишда ёрдам кўрсатади, тўлақонли турмуш тарзини кечириш, уларда ижодкорлик, жамоатчилик фаоллигининг ривожланиши учун қулай шароитларни яратади.
Терма жамоамизнинг бу йилги DiaEuro2015 мусобақасида иштирок этиши бу мусобақалардаги учинчи иштироки бўлади. Бунгача терма жамоамиз Киевда ўтказилган DiaEuro2012 ва Венгриянинг Балатонфюред шаҳрида ўтказилган DiaEuro2014 да иштирок этган.