Бугун Жанубий Корея кей-лигасининг 8-тур ўйинлари бошланди. Дастлаб «Инчон Юнайтед» ўз майдонида чемпионатнинг етакчи клубларидан саналган «Поханг Стилерс» билан 1:1 ҳисобида дуранг ўйнаган бўлса, Улсан шаҳридаги «Mansu World Cup Stadium»да мезбонлар «Улсан Хёндэ» клуби кей-лига турнир жадвалида 11-поғонада бораётган аутсайдер «Бусан»ни қабул қилди.

Ўйинда мезбонларнинг осонлик билан ғалаба қозониши тахмин қилинганди. Аммо улсанликларнинг бир қатор ҳужумлари самарасиз якун топди. Аксинча, «Бусан» қарши ҳужумларда анча хавфли ҳаракат қилди. Ўйиннинг 43-дақиқасида кутилмаганда бусанликларнинг бразилиялик ёш ҳужумчиси Весли Алвес мезбонлар дарвозасини ишғол этди. 2-бўлимда ҳам мезбонлар босимни кучайтиришди. Айниқса, 51-дақиқада Ўзбекистон терма жамоаси сардори Сервер Жепаровнинг чамаси 25 метрлардан берган жарима зарбаси дарвоза тўсинига тегиб қайтди. Учрашув давомида ҳамюртимиз «Улсан Хёндэ»нинг деярли барча бурчак зарбаларини амалга оширганлиги эътиборга лойиқ. Улсанликлар бош мураббийи Юн Жонг Хван 73-дақиқада Сервер Жепаровнинг ўрнига Ко Чанг Хённи майдонга туширди. Ўйиннинг сўнгги дақиқасига келибгина улсанликлар Ким Жонг Хёкнинг киритган голи эвазига аранг мағлубиятдан қутулиб қолишди.

Шундай қилиб, чемпионатни кўтаринки руҳда бошлаган Сервер Жепаров жамоадошлари кетма-кет тўртинчи марта дуранг қайд этди ва шундан 3таси аутсайдерлар билан ўйинларга тўғри келяпти. Бугун ва эртага кей-лига 8-турнинг қолган ўйинлари бўлиб ўтади. 9-тур ўйинлари эса 5 майга белгиланган ва унда «Улсан Хёндэ» Жежудо оролига, «Жежу Юнайтед» майдонига сафар қилади.

Отабeк Йўлдошeв
Жанубий Корeя, Сeул