Хитой пойтахти Пекин шаҳрида 2015 йилнинг 22-30 август кунлари спорт қироличаси саналмиш енгил атлетика бўйича жаҳон чемпионати бўлиб ўтади. Марафон мусобақасида Ўзбекистон терма жамоаси аъзоси Ситора Ҳамидова ҳам стартга чиқади.
Ушбу ҳуқуқни терма жамоамиз етакчиларидан бири Польша пойтахти Варшавадаги халқаро марафонда қўлга киритди. Халқаро енгил атлетика федерацияси (ИААФ) томонидан “кумуш пойга” мақомига эга баҳсда Ситора марафон масофасини югуриб ўтиш учун 2 соат 41 дақиқа 49 сония сарфлади ва марра чизиғини 8-бўлиб кесиб ўтди.
Эътиборга молик жиҳати шундаки, дастлабки 10 ўрин эгаларидан олтитаси африкалик югурувчилардир. Осиёдан фақат Ситора Ҳамидовагина кучлилар сафидан жой олишга муваффақ бўлди.
Омонбой Тўхтамирзаев
