Мамлакатимизнинг биринчи рақамли теннисчиси Денис Истомин Туркиянинг Истанбул шаҳрида давом этаётган Istanbul Open турниридаги иштирокини ғалаба билан бошлади. Мавсумни омадсиз ўтказаётган ҳамюртимиз ниҳоят ушбу турнирнинг илк даврасида зафар қучди.
Роппа-роса бир соат давом этган баҳсда Истомин франциялик Бэнуа Пэрни 6:3, 6:4 ҳисобида мағлубиятга учратди. Денис учрашув мобайнида 5та, Бэнуа эса 2та эйс зарбани амалга оширди. Таққослаш учун, Истомин дунё рейтингида 66, Бэнуа эса 73-ўринни эгаллаб турибди. Энди ҳамюртимиз иккинчи даврада россиялик Михаил Южнийни мағлубиятга учратган бразилиялик Томаз Белуччи билан муносабатларига ойдинлик киритиб олади.
Эслатиб ўтамиз, Istanbul Open турнирининг умумий мукофот жамғармаси 494,310 еврони ташкил этади. Мусобақа ғолиби 80 минг евро муклофот пули ҳамда 250 рейтинг очкосига эга бўлади.
