«Sport-express.ru» сайти Россия Премьер-лигасининг 25-тур ўйинлари статистикаларини тақдим этди. Унда турли кўрсаткичлар бўйича турнинг энг яхшилари аниқланди.

Ўзбекистон терма жамоаси етакчиларидан бири, «Краснодар» ярим ҳимоячиси Одил Аҳмедов 25-турда ҳаммадан кўп аниқ тўп узатишларини амалга оширди. «Краснодар»нинг 1:0 ҳисобидаги ғалабаси билан якунланган «Локомотив»га қарши учрашувда ўзбек футболчиси 112 та тўп узатди, пасларнинг 103 таси манзилга аниқ етиб борди. Ушбу баҳсда Одил Аҳмедов ўз жамоаси сафидаги аниқ тўп узатишларининг 18,5 фоизига муаллифлик қилган.

Солиштириш учун, Англия Премьер-лигасининг ўтган ҳафтадаги ўйинларида тўп узатиш бўйича энг яхши кўрсаткични «Ливерпуль» сардори Стивен Жеррард қайд этганди. Жеррард «Вест Бромвич»га қарши учрашувда 98 та аниқ пас берган.