Бугун Жанубий Кореяда Хана Банк КФА Кубогининг 1/16 босқич ўйинлари бўлиб ўтди. Осонлик билан кейинги босқичга чиқиши тахмин қилинган кей-лига гигантлари анча тер тўкишга мажбур бўлишди.

Дастлаб Кей-лиганинг амалдаги ғолиби «Чонбук» пастки дивизион вакили ҳисобланган «Гоянг Хи - Фи» клубини қийинчилик билан 1:0 ҳисобида мағлуб этган бўлса, «Бусан» ўз майдонида 2-дивизион клуби «Гангвон»га 2:3 ҳисобида мағлуб бўлди ва Кубок билан ҳайрлашди. «Сеонгнам» эса сафарда 2-дивизионнинг бошқа клуби ҳисобланган «Бусан Йўл Созлаш Корпорацияси»ни аранг 1:0 ҳисобида енгди.

Кубок баҳсларининг энг шов-шувли натижасини «Сеул Эланд» клуби қайд этиши мумкин эди. Ўтган йили ташкил этилган ушбу клуб 2-дивизионда қатнашаётган бўлса-да, ҳомийлар томонидан катта маблағлар ажратилиши натижасида Кореядаги энг қиммат трансферларни амалга ошириб тилга тушди. Жамоа тез орада кей-лигага чиқиш ҳаракатида сармояни аямай сарфламоқда. Ушбу клуб бугун терма жамоамиз сардори Сервер Жепаров тўп сурадиган «Улсан Хёндэ» клубини анча қийнай олди. Асосий вақтда 1:1 ҳисоби қайд этилгач, қўшимча бўлимлар белгиланди. Лекин қўшимча бўлимларда ҳам дарвозалар даҳлсиз қолди. Қўшимча бўлимларда «Сеул Эланд»нинг бразилиялик футболчиси Тарабай қизил карточка олди. Аммо улсанликлар сон жиҳатдан устунликни ҳисобда акс эттира олишмади. Пенальтилар сериясида эса «Улсан Хёндэ» ва Жанубий Корея терма жамоаси дарвозабони Ким Сеунг Гю битта зарбани бартараф этди ва пенальтилар серияси 6:5 ҳисобида «Улсан Хёндэ» фойдасига ҳал бўлди. Айтиш жоизки, улсанликлар ҳам бошқа кей-лига жамоалари каби иккинчи таркиб футболчилари билан ҳаракат қилишди. Шу туфайли ҳамюртимиз Сервер Жепаров бугунги ўйинда иштирок этмади.

Отабек Йўлдошев
Жанубий Корея, Сеул