«Нефтчи»нинг «Бунёдкор»га қарши ғалабасидан сўнг Фарғона клуби таркибида илк мавсум ҳаракат қилаётган ушбу футболчи ҳақида ёзишга қарор қилдим. Чунки охирги баҳсларда Аббос бизга ўша ўсмирлар терма жамоасидаги Махсталиевни эслатмоқда.

Ўз вақтида ўсмирлар терма жамоасида ўзини кўрсатган Аббос Махсталиев охирги  пайтларда кўринмай қолганди. Биздаги энг катта муамо ҳам шу аслида, истеъдодларни кўп бой берганмиз. Ёшларимиз дилни қувонтириб, кўзни қамаштириб порлашади. Аммо қандай катта тезлик билан порлашган бўлса... Фикримни тушундингиз. Ёшларни катта футболга олиб киришда кўп талофат кўряпмиз. Кўп истеъдодларни йўқотиб қўйяпмиз. Тўғри, ҳаммаси ҳам эмас. Бироқ Темур Ҳакимов ва Аббос Махсталиевни ўша терма жамоадаги ёрқин ўйинларидан сўнг хориж клубларидан таклиф олишини ёки мамлакатимизнинг етакчи клубларида асосийлардан бири бўлишини кутгандик. Аниқроғи, ишонгандик. Аммо бугунги кунда Темур «Оқ-тепа»да, Аббос эса «Нефтчи»да ҳаракат қиляпти. Майли, келинг, фожеа ясамайлик. Муҳими, ушбу йигитлар айни пайтдаги жамоаларида яхши ҳаракат қилишяпти. Мухлислар улардан хурсанд.

Ҳозир эса Аббоснинг Фарғонадаги фаолияти ва жамоадаги ўйинига тўхталиб ўтамиз. Ундан аввал эса Мурод Исмоиловни мавсум олдидан Аббос ҳақида билдирган фикрларига эътибор қаратамиз: «Аббос - бу Аббос. Махсталиев ўтган йили «Андижон»да ўзини кўрсатгани учун бу йил уни Фарғона клубига чақирдик. Ундан кўп нарса кутяпман. Ҳали кўрасиз, бу йил нафақат «Нефтчи» мухлислари учун балки бутун ўзбекистонлик футбол ишқибозлари учун Аббосдан қандайдир яхши янгилик бўлади» деб айтиб ўтганди «Нефтчи» бош мураббийи.

Ҳақиқатдан ҳам бу йил Аббоснинг «Нефтчи»даги ишлари яхши кечмоқда. Сўнггги баҳсларда асосий таркибда майдонга чиқмоқда. Эътибор берган бўлсангиз, «Бунёдкор» жамоасига қарши ўйинда ҳужумкор футболчи, жамоа ортга чекинганда ўнг қанот ҳимояда ўйнади. Мана сизга кутилмаган ҳолот. «Машъал»га қарши Фарғонадаги ўйинда эса сал бошқачароқ бўлганди. Яъни «Нефтчи»нинг марказидаги футбочилар Холматов тушгунга қадар фақат чап қанотда Аббосга ишлашди. Уни кўпроқ чап тарафдан жарима майдонига яқинлашига имкон беришди. Ўтган турда эса ўзига умуман бегона бўлган қанотда тўп сурди. Нимадир сездингизми ? Мурод Исмоилов Аббосни қайтадан кашф қилмоқда! Унинг имкониятларидан ҳар хил услубида фойдаланиб кўряпти. «Нефтчи» устози кўп бир жумлани қайтаради: «Футболчиларимизнинг имкониятдан унумли ва тўғри фойдалансак, марра бизкини». Демак Исмоилов Аббосдан унумли фойланмоқда. Ҳа, кўп нарса мураббийга ҳам боғлиқ. Нега Аббос терма жамоада муваффақиятли ҳаракат қилиб, кейинчалик Олий лигада йўқолиб қолди? Балки етакчилик руҳияти кучли бўлган Махсталиевдан қандай фойдаланишни мураббийлар билишмагандир ёки футболчи юлдузлик касалига чалинганмиди?

Хуллас, охирги пайтларда футболчи «Нефтчи» устози қўл остида ўзини кўрсатяпти. Жаҳон чемпионати саралаши доирасида жиддий ўйинларни қарши олаётган МТЖмиз учун ҳам мана шундай ёш истеъдодларни «қайтиш» қилиш айни мудаодир. Аббос нафақат сўнгги икки баҳсда, балки бутун мавсум давомида мана шундай юқори темпда ҳаракат қилишини кутиб қоламиз!

Ҳожиакбар Жабборов.
«Рухсор» радиоси.