Кеча Осиё Чемпионлар лигасининг сўнгги тур ўйинлари ўтказилганидан хабарингиз бор. "А" гуруҳидан ўрин олган “Ан-Наср” (Саудия Арабистони) – “Лахвия” (Қатар) ўйини ушбу гуруҳдан кейинги босқичга чиқадиган иккинчи йўлланма соҳибини аниқлаб берди. Саудия Арабистони клуби ўз уйида кечган ўйинда 1:3 ҳисобида имкониятни бой берди.

Ушбу ўйиннинг охири жанжал билан тугади. Ҳакамнинг ушрашув якунланганлигини билдирувчи ҳуштаги янграши билан мезбонларнинг уругвайлик ярим ҳимоячиси Фабиан Эстоянофф либосини ечган кўйи югурганча “Лахвия” жамоасининг иккинчи голини киритган кореялик Нам Тэ Хига мушт туширди. Уругвайлик футболчининг хатти-ҳаракати камераларга муҳрланиб қолган. Бу ҳолат юзасидан “Ан-Наср” ўз баёнотини эълон қилди ва футболчига жазо сифатида унинг маошидан 50 фоизини ушлаб қолишини билдирди.

Ҳозирча Жанубий Корея футбол Ассоцияцияси бу вазиятга муносабат билдирганича йўқ. Аммо корейс матбуоти аллақачон енг шимариб, уругвайлик футболчини қоралашга тушиб кетган. Жумладан, "Daily Hankook " нашри февраль ойида Таиландда бўлиб ўтган Тоҳир Шамсиддинов воқеасини эслаб ўтд:

"Олимпия терма жамоамиз аъзоси саналган Шим Санг Минга қўл кўтарган Тоҳир Шамсиддинов 1 йилга футболдан четлатилган ва унинг устози Шуҳрат Мақсудов эса Ўзбекистон олимпия терма жамоаси бош мураббийлигидан озод қилинган эди. “Ан-Наср”нинг уругвайлик футболчиси қилган ҳаракатлар ҳам Шамсиддиновникидан асло қолишмайди. Биз қўл қовуштириб ўтирмасдан ушбу вазиятга совуққонлик билан муносабатда бўлишимиз лозим", деб ёзяпти ва Корея футбол Ассоцияциясини қатъиятлироқ бўлишга ундамоқда.

Қуйида “Ан-Наср” – “Лахвия” ўйини сўнгидаги вазиятни томоша қилишингиз мумкин.