Супероғир вазнда WBA йўналиши бўйича доимий жаҳон чемпиони, ҳамюртимиз Руслан Чагаев 11-июль куни Магдебургда италиялик Франческо Пьянета билан жанг ўтказади.
Бу ҳақида Россиянинг ИТАР-ТАСС ахборот агентлиги хабар тарқатган. 2014 йил июлида Чагаев Грозний шаҳрида пуэрто-риколик Фреса Окендо мағлуб этиб, WBA камари соҳибига айланганди. 36 ёшли боксчимиз шу вақтгача рингларда 33 ғалаба (20 таси нокаут билан) бир дуранг ва икки мағлубият қайд этган.
“Оқ Тайсон”нинг рақиби 30 ёшли Пьянета бокс ихлосмандларига украиналик Владимир Кличко билан ўтказган жанги орқали яхши таниш. Ўшанда у олтинчи раундда техник нокаутга учраб, Кличкога ютқазганди. Италиялик боксчи профессионал боксда 31 жангда ғалаба қозониб (17 нокаут), бир дуранг ва бир мағлубият қайд этган.
