Бугун Ўзбекистон Футбол Федерацияси мажлислар залида ЎФФ ҳакамлар ва инспекторлар департаменти Олий ва 1-лига ҳакамлари учун ўқув-текширув семинар ташкил этди.

Семинарда хорижда хизмат сафарида бўлган реферилардан бошқа барча ҳакам ва инспекторлар иштирок этди.

Ўқув-семинари Олий ва 1-лига доирасидаги мавсум аввалида бўлиб ўтган ўйинларда ҳакамларнинг ҳаракати, йўл қўйган хато ва камчиликларига бағишланган тақдимотлар билан бошланди. Ҳакам ва инспекторлар семинар давомида Ўзбекистон футбол мавсумининг ўйинларини видеоматериаллар асосида таҳлил қилдилар.

ФИФА ва ОФК инструктори Фарҳод Абдуллаев видеоклиплар асосида ҳакамларнинг хатоларини таҳлил қилиб берди ҳамда ҳар бир вазият борасида ҳакамлар берган саволларга ҳам жавоб бериб ўтди.

ФИФА рефериси Владислав Цейтлин видеоклиплар асосида ўйиндан ташқари ҳолатни қайд этишдаги хатолар ҳақида тўхталиб, турли ўйинлардаги офсайд ҳолатларини таҳлил қилиб берди. Ушбу мавзуни давом эттирган ЎФФ инструктори Александр Попов офсайдни қайд этишда ён қанот ҳакамлари йўл қўйган хатолар ҳақида таҳлилий чиқиш қилди. Попов, шунингдек, тўпни қўл билан ўйнаш билан боғлик муаммоли вазиятларни ҳам таҳлил қилиб берди.

ПФЛ бош директори Фарҳод Магаметов ўз нутқида ҳакамлар ва инспекторларга нисбатан ўйинлар жавомида ноцензур сўзлар билан ҳақорат қиладиган мураббийларга қаттиқ туриш кераклигини тайинлади.