Равшан Ҳайдаров бошчилигидаги Ўзбекистон U-20 терма жамоаси Тошкентдаги сўнгги йиғин доирасида пойтахтнинг “Оқтепа” клуби билан ўртоқлик учрашуви ўтказди.

30 май куни бошланадиган ёшлар ўртасидаги Жаҳон Чемпионатига тайёргарлик кўраётган Ўзбекистон U-20 терма жамоаси учун бу Тошкентдаги сўнгги назорат учрашуви эди. Ушбу ўйинда мураббийлар штаби таркибдаги барча футболчиларни яна бир бор синовдан ўтказиб кўрди.

Учрашувда ҳисоб 16-дақиқада очилди. Ўзбекистон ёшлар терма жамоаси бурчак тўпини амалга оширганидан сўнг, “Оқтепа” ҳимоячиси Жўрабек Собиров ўз дарвозасини ишғол қилиб қўйди. Бу гол биринчи таймда ягоналигини сақлаб қолди.

Иккинчи бўлимда жарима тўпидан унумли фойдаланган “Оқтепа” ҳужумчиси Алишер Шоғуломов ҳисобни тенглаштирди.

Ўйиннинг асосий вақти ушбу ҳисоб билан тугади. Шундан сўнг жамоалар пеналтилар серияси орқали ғолибни аниқлашди. Ўн бир метрлик жарима зарбаларини Ўзбекистон ёшлар терма жамоаси муваффақиятлироқ амалга ошириб, 4:3 ҳисобида ғалаба қозонди.