30 май куни Янги Зеландия яшил майдонларида ёшлар ўртасидаги Жаҳон чемпионати старт олади. Яхши биласиз, ушбу нуфузли турнирда юртимиз шарафини Равшан Ҳайдаров устозлигидаги Ўзбекистон U-20 терма жамоаси ҳимоя қилади.
Кичик мундиалга анча пухта тайёргарлик олиб борган ёшлар термамизнинг ҳозирда сўнгги йиғини давом этмоқда. Биз ушбу ёшдаги терма жамоамиз сафида етакчилардан бири саналувчи “Бунёдкор” аъзоси Элдор Шомуродов билан учрашиб, ёш ҳужумчининг мусобақа олди фикрлари билан қизиқдик.
“Жаҳон чемпионатига яхши тайёргарлик кўрдик. Бир нечта йиғинлар ташкил этилди. Яхши савиядаги рақиблар билан синов-назорат учрашувларида майдонга ҳам тушдик. Жамоамиздаги ички муҳит ажойиб даражада. Барча йигитлар яхши ўйин кўрсатиб, мухлисларимизни хурсанд қилиш ниятида. Насиб қилса бу ниятимизга етамиз. Мухлисларимиз бизни қўллаб-қувватлаб туришса бас.
Яқинлашиб келаётган Жаҳон чемпионатида ярим финалга қадар етиб боришни кўзлаб турибмиз. Ўйлашимча, бунга жамоамизнинг салоҳияти етади. Агар мураббийларимиз берадиган кўрсатмаларни тўғри бажарсак, ушбу вазифани уддалашнинг имкони бор. Аммо олдиндан бирор нарса дейиш ҳам қийин. Буёғини энди вақт кўрсатади.
Ўзим терма жамоамизнинг ҳар бир учрашувида майдонга тушиб, голларим билан жамоамизга ёрдам беришни мақсад қилаяпман. Насиб қилса, чемпионат тўпурари бўлиш учун интиламан. Лекин энг асосийси - бу жамоавий ютуқдир. Умид қиламанки, терма жамоамиз мухлисларимиз кутаётган ўйинни намойиш эта олади ва уйга ёруғ юз билан қайтамиз”, - дейди иқтидорли ҳужумчи SPORTS.uzга.
Зоҳирбек Акрамхонов ёзиб олди
