“Қўқон-1912” – “Шўртан” (2:1) учрашуви якунига етгач ўтказилган матбуот анжуманида мезбонлар устози Рустам Раҳмонович иштирок этиб, ўз фикрларини билдириб ўтди.

"Бугун ўзинглар ҳам кўрдинглар биринчи бўлимда 2:0 ҳисобида олдинда бориб, устунликни ўзимизга олгандик. Лекин иккинчи тайм бироз қийин кечди. Бу табиий эди. Чунки рақиб жамоа ҳам мағлубиятдан қутилиб қолиш учун курашарди. Ўйлайманки, бу руҳият билан боғлиқ. Ҳар қандай жамоа иккита ёки ундан ортиқ гол уриб ҳисобда олдинда бораётганида шундай бўлади. Чунки ғалабани сақлаб қолиш учун ҳаракат қилинади. Йигитларимизда ҳам иккинчи бўлимда шундай бўлди назаримда.  

Янада кўпроқ гол уришимиз учун вазиятларга эга бўлдик. Биринчи бўлимнинг ўзидаёқ ҳисобни 3:0 қилиб олишимиз ҳам ҳеч гап эмасди. Шундай бўлганида босим бироз пасайган бўларди. Лекин бугун муҳими уч очкони қўлга киритдик. Олдин ҳам айтганман, футболчиларимга ишонаман. Улар бугун иродасини кўрсатди. Бунинг учун раҳмат.  

Мухлислар ҳам бугун бизни ажойиб тарзда қўллаб-қувватлади. Уларга алоҳида миннатдорчилик билдирган бўлардим. Қолаверса жонкуяр раҳбарларимиз ҳам бугун стадионга келиб, бизга далда бўлди. Бутун жамоа номидан уларга раҳмат айтаман.

Ҳужумчимиз Владимир Аргуннинг бугун туғилган куни эди. Йигитлар ўйиндан олдин унга муносиб совға қилишга қаттиқ бел боғлаганди.

“Шўртан” ҳам яхши жамоа. Таркибида маҳоратли ўйинчилар талайгина. Ўйиндан олдин қандайдир ҳадик бор эди. Умуман олганда чемпионатдаги интрига ортиб бормоқда. Кутилмаган натижалар бўляпти. Фикримча чемпионат қизиса, бундан футбол ютади. Мухлислар... Футболчилар.

Бугун рақиб жамоа таркибидан Виктор Карпенконинг ўйинини алоҳида таъкидлаб ўтган бўлардим. Унинг бой тажрибаси “Шўртан”га асқотмоқда дейиш мумкин. Ўз жамоамдан эса очиғи, алоҳида битта ўйинчини кўрсатиб ўтишим қийин. Бугун ҳамма ғалаба учун астойдил ўйнади. Менимча Носир Отақўзиев бошқалардан ажралиб турди. Ҳар икки голда ҳам унинг ўрни катта бўлди", – дейди Рустам Абдуллаев.