Хабарингиз бор, 30 май куни Янги Зеландия яшил майдонларида ёшлар ўртасидаги Жаҳон чемпионати баҳслари старт олади. Ушбу нуфузли турнирда юртимиз шарафини Равшан Ҳайдаров устозлик қилаётган Ўзбекистон U-20 терма жамоаси ҳимоя қилади.
Сайтимиз орқали терма жамоамиз аъзоларининг мундиалолди фикрларини бериб бормоқдамиз. Бу гал мусобақаолди таассуротлари билан терма жамоамиз посбони Дилшод Ҳамроев ўртоқлашади.
“Олдинда бизни жуда нуфузли мусобақа кутиб турибди. Бундай йирик масштабдаги турнирда илк бора иштирок этаман ва бу мен учун катта мактаб бўлади. Бунга ишончим комил.
Янги Зеландияда бўладиган мундиалга яхши тайёргарлик олиб бордик. Биз бир неча марта яхши савиядаги рақибларга қарши ўйнадик. Ташкил этилган барча йиғинлар аъло даражада ўтди. Яратиб берилган шарт-шароитлар учун федерциямизга миннатдорчилик билдирамиз.
Кичик мундиалда терма жамоанинг асосий посбони ким бўлади, деган савол мени қаийнаётгани йўқ. Мураббийлар штаби кимни маъқул топса, ўша дарвозани қўриқлайди. Биздан имкон берилса, ўзимизни ҳар томондан кўрсатиб, яхши натижаларга эришиш талаб этилади.
Юртимиздаги кўпсонли футбол мухлислари биздан муваффақиятли иштирок кутишмоқда. Буни яхши англаб турибмиз. Биз ҳам Жаҳон чемпионатида яхши иштирок этган ҳолда юртимизга ёруғ юз билан қайтмоқчимиз. Ҳозирда барчамизнинг кайфиятимиз аъло даражада. Насиб қилса, Жаҳон чемпионатидан кейин ҳам шундай ҳолда уйга қайтамиз”, - дейди иқтидорли дарвозабон.
Гувоҳи бўлганингиздек, мусобақа олдидан терма жамоамиз йигитларининг шаштлари баланд. Биз ҳам уларга ишонч билдирган ҳолда, вакилларимизнинг Жаҳон чемпионати совриндорлари қаторидан ўрин олишларини кутиб қоламиз.
Зоҳирбек Акрамхонов ёзиб олди
